復康治療在社區 Rehab Anywhere！
Helen聽過有啲病人話做完物理治療後，返到屋企唔記得治療師教過嘅運動。雅麗氏何妙齡那打素醫院一級物理治療師麥卓恒有妙法！麥Sir早前同團隊花咗500小時嘅工餘時間，以「rehab anywhere」嘅復康理念模式，喺2018年10月初製作咗《關節置換術後復康指南》網頁。
呢個網頁有八個單元，包括短片介紹術後初期運動、功能訓練同護理錦囊，最厲害嘅係大埔「運動地圖」，臚列出大埔區內80個有物理治療運動功能嘅公共運動設施，病人可以知道最近佢哋屋企嘅物理運動設施喺邊度，keep住做練習；而物理治療師亦可因應病人住所附近嘅設施，為佢地安排一啲合適嘅訓練。醫護人員同病人都得益，大讚資訊夠「貼地」！
