張偉麟「偉論」教你踏上成功路

張醫生寄語年輕同事，除咗做好臨床工作，仲要認識這醫療體制，如使命、挑戰等，先可以結合及與體制共同進步，發揮長處，幫助病人。

「勢不可擋、潛行思間……」Helen講緊嘅唔係武功心法，而係聯網服務總監張偉麟醫生「臨兵十式」入面嘅招式。張醫生早在兩年半前已開始舉辦一系列分享會，以「成功之路」為主題，透過自強篇、掌握篇、分析篇、決定篇、成功篇同臨兵十式，與同事分享佢嘅成功之道。

張醫生認為要成功，就要了解自身嘅優勢同不足，同埋對社會嘅價值，然後識得創造同把握機會。佢話自己小四時已立定志向，要做個出色嘅人，更形容自己細個「好乖，唔算太活躍，但會把握機會參加學生活動，例如做社長」。

回顧30多年行醫經驗，佢嘅成功經歷原來係咁：（一）累積專業知識：張醫生喺瑪麗醫院急症科出身，九年間學習急症專科知識，累積治理病人嘅經驗；（二）拓展知識領域：之後佢去咗威爾斯親王醫院擔任部門主管，兼任醫院管理嘅崗位，當中涉獵多元化工作，如法律、傳媒等；（三）綜合經驗技能：張醫生結合專科同管理經驗，轉型為全職管理人，擔任新界西醫院聯網總監和總辦事處聯網服務總監，發展社會醫療服務系統。