同事康體娛樂費人均增至133元

同事喺今屆「工商機構運動會」表現出色，分別喺七人小型足球、網球、籃球、排球、長跑同田徑賽事都攞到冠軍！

仲有幾個星期就係聖誕節，一年一度嘅醫管局周年晚宴又嚟啦！唔講你可能唔知，原來聯網同醫院舉辦嘅康樂活動，如周年晚宴、興趣班、體育活動同各種員工福利，部分經費嚟自「員工福利基金」同「醫管局聯營信用卡及職員合作社回贈」嘅資助。

Helen最近收到好消息，今年「員工福利基金」有新安排，每人資助額增至97元，加上「醫管局聯營信用卡及職員合作社回贈」嘅36元，每人共有133元資助。總辦事處人力資源部今年8月已按醫院員工數目，將款項分發俾各聯網，希望醫院搞多啲唔同類型嘅活動俾同事參加，實踐work-life balance嘅文化。講開又講，我哋唔少同事都鍾意做運動，仲喺早前康文署舉辦嘅全港「工商機構運動會」拎到卓越成績，連續第六屆勇奪甲組全場總冠軍，認真巴閉！