今期流行抗流感針針都係愛

九龍西醫院聯網總監謝文華醫生同聯網護理總經理陳燕萍粉墨登場，宣揚「針針都係愛」嘅訊息。

講到HA今期流行，一定係打流感針啦！總辦事處、聯網以至醫院，同事都施展渾身解數，互相鼓勵打針抗流感。

除咗總辦事處「打針大使」嘅PY早前帶齊道具，走訪唔同部門呼籲同事打針外，聯網同埋醫院同事亦落力大搞噱頭。有幾間醫院都製作短片，同事睇完會心微笑。好似九龍西醫院聯網總監謝文華醫生同聯網護理總經理陳燕萍粉墨登場，將打流感針比喻織冷衫同頸巾，表達「針針都係愛」嘅訊息；九龍中醫院聯網就有伊利沙伯醫院深切治療部顧問醫生吳榮耀扮演財經分析專家，教大家打針投資健康；仲有雅麗氏何妙齡那打素醫院同大埔醫院同事演繹自創歌《捲袖起行》；瑪麗醫院就將經典歌曲《獅子山下》改編成抗疫之歌，同一眾同事講：「這一針，可無畏更無懼。」講咗咁耐，Helen就打咗流感針，到你啦！