伊院威水食譜名揚海外

依家寫書嘅人好多，但能寫到名揚海外嘅就不多見。好似《協力》介紹過，由伊利沙伯醫院出版嘅 《準媽媽的好煮意》 今年7月就喺 「2015年度世界美食家大獎」嘅Best Diet Cookbook 分類中榮獲季軍，認真巴閉！

呢本書收錄咗將近 50 道食譜，仲提供產前產後運動、護理、哺乳、BB 照顧、及情緒支援等實用知識，直情係為孕婦度身訂做嘅通勝。

QEH 卅幾位產科及兒科醫生、護士、中醫師同營養師齊齊獻計，前後籌備咗至少大半年， 仲相互切磋咗幾輪。好似生完 B 飲木瓜章魚豬骨湯係補身良方，中醫師都極力推薦，不過營養師就嫌豬骨油脂太高。結果雙方熱烈討論之後搵到一個兩全其美嘅方法 ── 將食材豬骨轉做豬𦟌，減少油分攝入。