茶餐廳主題復康治療提升投入感

幫襯「茶記」係香港人生活一部分，香港佛教醫院職業治療部將茶餐廳搬到醫院，開設「杏林茶餐廳」，為患有認知障礙和社交能力較弱嘅住院長者提供每星期一次嘅復康治療。職業治療師會根據長者嘅能力安排扮演食客或侍應嘅角色，負責落單同埋單計數，鍛鍊腦筋。餐牌仲有散叫同茶餐，根據唔同組合配搭提升難度。

呢個復康治療大受長者歡迎，職業治療部部門經理陳旭彪話長者都非常投入：「佢哋嘅表現令大家都感到驚喜，佢哋變得積極主動，同病人、治療師都多咗互動，仲將呢種氣氛帶返病房，改善住院體驗。」長者喺茶餐廳裡面更加主動投入訓練，藉此增強溝通能力及刺激認知，出院後更易適應社區生活。

「杏林茶餐廳」除咗有經典嘅「磚牆」同「霓虹燈」招牌，牆上仲貼滿「茶記」招牌美食，好似菠蘿油同奶茶等，令長者更投入，令訓練更有樂趣。陳Sir仲話構思緊喺病房搞茶樓主題嘅復康治療，到時會有點心車，長者需根據餐單「製作」食物，聽落都覺得吸引，期待「杏林茶餐廳」業務擴展到病房！