屯門醫院農圃「種」生相

古有陶淵明歸園田居，享受田園生活，今有屯門醫院舉辦「餐桌農圃」種植活動，喺康復大樓2樓平台花園同主座花園開闢綠洲。活動由去年開始吸引咗接近260位嚟自50個唔同部門同病房嘅同事化身農夫，喺小農圃翻泥播種。

要有收成一啲都唔簡單，淋水、施肥、修枝、除草、驅蟲，樣樣都要親力親為。為咗了解更多栽種嘅技巧，佢哋參加咗種植工作坊，另外仲會善用環保資源，利用廚餘、咖啡渣、雨水等，為植物提供天然養分。

收成嘅大日子嚟到，各位同事聚首一堂舉辦試食大會，一齊分享簡單料理後嘅新鮮蔬果，能夠自己種菜自己食，份外滋味。新一期嘅種植活動將會喺10月展開，歡迎大家一齊嚟體驗種植嘅樂趣！