流感針：打定唔打？
為醫管局同事而設嘅流感疫苗注射服務已於10月6日開始，各位打咗未？未打嘅同事，等我哋為大家拆解疫苗嘅迷思。
資料圖片
都打咗新冠疫苗啦，仲使乜打流感針呀？
2019冠狀病毒和流感病毒係兩種唔同種類嘅病毒，若果同時感染呢兩種病毒，會有較大機會出現嚴重疾病同死亡。由於接種流感疫苗可以減少入院留醫嘅機會同住院時間，因此接種流感疫苗同新冠疫苗同樣重要。
我咁健康好少傷風感冒，唔使打流感針啦！
流感疫苗安全有效，而健康人士亦都有可能患上嚴重流感，因此，除咗個別有已知禁忌症嘅人士之外，所有年滿六個月或以上人士，都應該接種流感疫苗。
我成日病，打完流感針咪仲病啲？
除非對流感疫苗成分或接種疫苗後曾出現嚴重過敏反應，否則所有年滿六個月或以上人士都適合接種疫苗。如果打針當日病咗，可以等好番先打。
我對雞蛋敏感唔可以打流感針啦！
流感疫苗內雖然含有卵清蛋白（即雞蛋白質），但疫苗製造過程經過反覆純化，卵清蛋白嘅含量極低，即使對雞蛋敏感嘅人士，喺一般情況下亦都能夠安全接種。