熱血Donor遊 ! 全新流動捐血車遊走校園

有「新血」加盟香港紅十字會輸血服務中心！就係呢架全新流動捐血車，已經喺8月投入服務。車身上集齊本港各區地標嘅特色設計，正好配合番呢架車肩負走訪各區招募捐血者嘅重要使命。首個任務就係到訪各大校園同學生見面，梗係唔少得招募「新血」啦！

呢架流動捐血車內置三張電動捐血椅，可以調校仰臥角度，等各位「熱血」人士捐血時更加舒適。車廂內亦設有等候區、面見室及工作枱，可謂麻雀雖小，五臟俱全！車身外又裝咗一部43吋高清屏幕電視，隨時隨地播放教育及宣傳短片，為附近市民提供捐血資訊。

新捐血車流動性高，深入社區瓹窿瓹罅都一樣無難度，無論泊喺大型屋苑、商場、學校、社區中心或公園都得。新捐血車將會走訪各大專院校及中學校園招募「新血」，年輕人屆時就有機會親身體驗流動捐血車服務！