各位電競好手同埋才藝表演高手機會嚟喇！醫管局今年將會以試行模式，舉辦首屆「醫管局電競杯」同「醫管局才藝比賽」，俾大家可以喺繁忙嘅抗疫工作以外，有機會鬆一鬆，一展所長。

電競（電子競技）近年深受大人細路歡迎，更逐漸成為國際認可嘅運動項目。電競唔受地域、時間或者年齡嘅限制，大家可安坐家中享受打機嘅樂趣，最重要係符合防疫大原則：保持社交距離呀！講返今次比賽，HA正研究舉辦「足球個人賽」同「多人在線戰鬥競技場遊戲（MOBA）」隊制賽，初賽會以線上形式進行，而總決賽就要視乎疫情發展，有可能安排喺電競場館或者線上進行。

如果你有一技所長，又或者身懷十八般武藝，咁就要參加呢個才藝比賽啦！有興趣嘅同事只需透過網上遞交參賽才藝影片，評判就會選出表現優秀嘅個人及團隊參賽者，佢哋將會代表所屬聯網進入總決賽，有機會喺實體會場大顯身手，競逐才藝王嘅寶座。

以上兩個活動即將公布報名詳情，大家密切留意，快啲備戰啦！