心藏筆露：大晒的代價

「老闆早晨！老闆早晨！」每天早上在辦公室裏，這句說話，此起彼落，震耳欲聾，猶如君臨天下，群臣高呼萬歲。

「對唔住！對唔住！大老闆！」「係老闆，你真係英明，你講得好，我冇諗過你所講呢個咁聰明方法，好！我即刻跟你指示去做，全力以赴！」即使明顯是老闆的一派胡言，顛倒是非，下屬都會不斷點頭，同時不斷重複恭維和道歉的說話，然後彎下身，倒後行出他的辦公室，完全不敢頂撞老闆。

「爸爸，我託朋友古巴買返，食多幾支啦。」「老公，今晚咁高興，我飲多杯，唔好俾佢停。」兩段婚姻的伴侶以及和她們所生的子女，千方百計，扭盡六壬，騙取他的歡心，為的當然是他公司的股份。

但這一切，都已成過去。

身為富三代，業務差不多是獨市生意，他的公司仍然運作，但大老闆自從患上肝硬化，再加上肺氣腫、肺部以及腹腔嚴重積水後，再沒有力氣走進辦公室，大部份時間只能病在醫院，有家歸不得。

有天早上，隔鄰病床的一對夫婦因吵架吵醒了大老闆。「你仲食煙？你係咪想死呀？你仲飲酒？我就唔俾你返屋企！」「唔好呀，老婆！我冇你同埋呢個屋企，我乜都冇啦。」

老闆拉開布簾，看到女人一邊鬧，一邊攬她的丈夫。老闆蹣跚地走向洗手間，在門外遇見一個小孩被媽媽責罵︰「你仲打機！快收埋佢，聽日先可以再打。」小孩情緒失控，一腳踢向媽媽，卻誤中老闆。老闆當場跌倒，淚流兩行，把那兩母子嚇得要命，怕要賠償巨額湯藥費。老闆拍一拍小孩的肩膀，母親即大叫：「唔好打佢呀，好對唔住呀！」誰知，老闆對小孩說：「我成世人，只係聽過人對我講對唔住，從來無人對我說不，所以我就咁折墮。仔，我好羨慕你。乖，唔好打咁多遊戲機。」

其實不需要像這位老闆一般「大晒」，很多人隨年紀「大」一些，身邊已經沒有人會冒險真誠地規勸，指正錯誤。正所謂忠言逆耳，如果工作間和家庭中仍然有人對你說「逆耳忠言」，即使對方是嘮叨了一點、說話技巧笨拙了一點，但整體來說，能有這些說話入耳，也是一份難得的福氣。

撰文︰青山醫院精神健康學院副顧問醫生崔永豪

隔周二刊出

(轉載自蘋果日報 | 心藏筆露 | 2019-10-29)